Phili 3 | GbrGAW | STEP | Ɓeho-ɓehoi n kwa zhin, emi anugundo fye dagma fi n Dagayi, ata ɓe mi n fye ce gna yi n. Kwo bmiya lo n fya ba fya wo ce ci.

Philippians 3

1 Ɓeho-ɓehoi n kwa zhin, emi anugundo fye dagma fi n Dagayi, ata ɓe mi n fye ce gna yi n. Kwo bmiya lo n fya ba fya wo ce ci.

Peceye Nna Malami Nukwoyi

2 Fye zhin peceiye n na za nukwoyi, amwi, nɓa gna ge sai oza zhin kaciya nu a kpe wo gni nyi. 3 Gama eyi nayi zunya nu ta ze yi Shekwoyi aɓin, mwa-mwa ga nu n yi Zafun yi, kaciya hin-hin nu, eyi a Yesu viyi, yi dagma fi n nya n Kristi Yesu ku zhin gayi, yi kpe ge yita mi n yihin bma-zhin ya gni yihin tukwon. 4 Ndei oza lo n wo gye ge wo ɓei ɓa mi wa gni wohin, emi nu, ngye aza ɓei ɓa pwo ntu n nya ɓo n wo n cei, mi ɓei ɓa mi ma pwo. 5 Gama nyipyei nyimwa-nyimwai nu n na ɓei zhin mi kaciya, a mami dna Yahudiyi hin-hin puwa, Banyami bye. Ntu cenu mi zhin Yahudiyi za hin-hin nu. Knido nu shasun, mi ɓei dna n na a Farisiyi fye nu, n ɓa vi a Yahudiyi awyidna n na akunu yi n kala yi nyi. 6 N wyenyi? E, har ma ma ga ikklisiya wahala ma zhin atna ma shi a Yahudiyi awyidna bwa vinya.

7 Ama anya deye vinya n mi ɓei gye ɓa n na pmai, nsaiye mi ku ɓa ya vinya n na bai ma kpema, ma tu awye n Kristi nu gmanyi. 8 E, anya vinya zhin gbeloyi nu, n na mwi ɓa do n gyibai nza ɓa bwa woi ya kpema Kristi Yesu emi Dagayi. Miku anya ya vinya, mito ze ɓa n gye nyahon n na abai ma bwa Kristi. 9 Maze gmanyi n woi, to a shan gna ge ma bwa gni-gni ntu n mi ɓe manayi zhin ɓo nu m, ko Shekwoyi awyidna bwa shin, ama ma ga Kristi gaiciya wa gni mi nu, gama Shekwoyi zokwo n wo zeyi aza ɓefyece da, ko nu zhin gaiciya ga dna n Kristi gmanyi. 10 Nsaiye mi ku anya vinya ya, miku gye okwonu zhin zokwo gmanyi n za ɓa kpe Kristi ye, oza kpe iko ye n kwo ɓo je wo wye-wyeyi ga nyi, ma bwa awyega wahala sin nya, n fi yi ngnisun n woi. 11 Nya n kwa zhin, emi nu ɓa zhin oza n wo bwa wyewyeyi woi-woyi dna na za n ɓa ku fi ɓa je wye-wyeyi bwa.

12 Mita ye ma ci ge mi la ze oza tna-laifi da nu n, mito tu aɓo mwi n kwo kunce ma tu mwi n. Ama mi zhin tnu-tnu lo abye har ewyi n mi ɓei ze enya n Kristi wa gni mi ntu ce, woi yemi ma ze nyi.

13 Omi azaje, har sayi mi to ze enya n mi ye ma zen, Awo, ama mi zhin atna n mi akala yi vinya ma zhin ɓeye gmanyi. Mi-i ze aɓo amwi n ko la diya, mi-i shi oɓo awye n kwo lo na bye. 14 Mi zhin atna masi asibui cezhi ba, ma gwo lada n Shekwoyi wa yi-yi ya lo she, ntu nya ɓo n Kristi Yesu wa zhin gayi nyi. 15 Mi n na wyetu yi lo efye n fye ku mwa fi n Yesu vi nyi, fye ɓa gye aɓeye n gnisun m miyi pei-pei. N fye to bwa awyega n na dohon, mi kpelo Shekwoyi ɓa ga fye awyegan n ɓa, 16 n fya vi gaiciya n fye n cei nyi.

17 Emi azaje, fye se ase n gye emi, n na ajeyi. 18 Gama miku gna fye n kmisunyi, ma je fye ce gna n saiye n na awye nyi yi, aza lo n ɓa zan-zan fi n a Yesu viyi zokwo, ama ɓa zhin Kristi zundu a nuɓayi nu. 19 Oɓa kpegni ba abwi nu, gama oɓa Shekwoyi kwo nu zhin ɓa shakpe, ɓai mwa ɓahin tukwo n ɓa kunce ɓa wo vinyikwo, enya nɓa zhin nubo vinya, okwo nu, zhin anyi ye n ɓa nyai vinya. 20 Ama eyi a-yi lo n ʼshemi, aba n yi gniyi, Dagayi Yesu Kristi nyi. Yiye zlii yi pmi wo nu, wa jeze zhi. 21 Sanu n wa jeze ɓe, wo ɓa la anayi fi-fi ye waga yi anayi mwamwa nya, ngye owo nya, woi zhin apma n iko dnagmayi, n wo ɓei zhin apma n cei wa gyi nasara n na ba vinya nyi.